काठमाडौं, भदौ २४ । नेपालमा फैलिएको भ्रष्टाचार र कुशासनविरुद्ध हालै जेन(जी पुस्ताले सुरु गरेको देशव्यापी आन्दोलनलाई राष्ट्रिय एकता अभियानले खुलेर समर्थन गरेको छ। सोमबार जारी प्रेस विज्ञप्तिमा अभियानका केन्द्रीय अध्यक्ष विनय यादवले युवा आन्दोलनलाई देशको भविष्य र परिवर्तनको दिशा देखाउने ऐतिहासिक कदमका रूपमा स्वागत गर्दै, “यो देश बचाउने नेतृत्व युवापुस्ताले नै लिएको छ, अब हामी सबै मिलेर भ्रष्टाचारलाई अन्त्य गर्नुपर्छ” भनेर जोड दिएका छन्।
अभियानको समर्थन र सन्देश
विज्ञप्तिमा भनिएको छ, “जेन(जी पुस्ताले सुरु गरेको शान्तिपूर्ण आन्दोलन नेपाली युवाको देशप्रतिको माया, चिन्ता र भविष्यप्रतिको आशाको ज्वलन्त उदाहरण हो। राष्ट्रिय एकता अभियान यस आन्दोलनप्रति पूर्ण ऐक्यबद्धता व्यक्त गर्दछ।”
अभियानले भ्रष्टाचारविरोधी लडाईँलाई आफ्नो पनि प्रमुख एजेन्डा भएको स्मरण गराउँदै पोखरा अन्तर्राष्ट्रिय विमानस्थललगायतका ठूला आयोजनामा भएको अनियमितताविरुद्ध विगतमा अभियानले गरेको आन्दोलनलाई उदाहरणका रूपमा प्रस्तुत गरेको छ।
दमनप्रति गहिरो आपत्ति
जेन(जी आन्दोलनका क्रममा विभिन्न ठाउँमा भएको सरकारी बल प्रयोग, गोली प्रहार र दमनका घटनाप्रति अभियानले गहिरो आक्रोश व्यक्त गरेको छ।
विज्ञप्तिमा भनिएको छ, “लोकतान्त्रिक मुलुकमा नागरिकले आफ्ना जायज माग राख्दा यसरी बर्बर दमन हुनु किमार्थ स्वीकार्य छैन। यस प्रकारका अमानवीय कार्यको राष्ट्रिय एकता अभियान घोर भर्त्सना गर्दछ।”
अभियानले आन्दोलनमा ज्यान गुमाएका युवाहरूको परिवारप्रति गहिरो श्रद्धाञ्जली अर्पण गर्दै पीडित परिवारसँग पूर्ण एकता प्रकट गरेको छ। साथै, घाइते भएकाहरूको शीघ्र स्वास्थ्यलाभको कामना पनि गरेको छ।
शान्तिपूर्णताको आग्रह
युवापुस्तालाई आन्दोलनलाई पूर्ण शान्तिपूर्ण, अनुशासित र रचनात्मक बनाउन आग्रह गर्दै अभियानले तोडफोड, हिंसा र राष्ट्रिय सम्पत्तिको क्षतिबाट बच्न विशेष अपिल गरेको छ।
विज्ञप्तिमा भनिएको छ, “हाम्रो वास्तविक शक्ति भनेको शान्तिपूर्ण र संयमित आवाज हो, जसले सबैको मन जित्न सक्छ।”
सरकारलाई चेतावनी र सुझाव
अन्त्यमा, अभियानले नेपाल सरकारलाई भ्रष्टाचारविरोधी जायज माग तत्काल सम्बोधन गर्न र आन्दोलनकारीको अधिकारको सम्मान गर्न आग्रह गरेको छ।
अध्यक्ष यादवले भने, “यदि सरकारले युवापुस्ताको आवाजलाई बेवास्ता गर्यो भने यो आन्दोलन अझ व्यापक र उग्र बन्छ। सरकार विवेकशील बन्नुपर्छ र तत्काल समाधानतर्फ अघि बढ्नुपर्छ।”
पृष्ठभूमि
हालै सामाजिक सञ्जालमार्फत सुरु भएको “जेन(जी आन्दोलन” काठमाडौंसहित मुलुकका प्रमुख शहरहरूमा हजारौं युवाको सहभागितामा फैलिएको छ। मुलुकभर बढ्दो भ्रष्टाचार, ठूला आयोजनामा अनियमितता, बेरोजगारी, अवसरको अभाव र शासक वर्गको गैरजिम्मेवार नीतिप्रति युवापुस्ताले देखाएको असन्तोष आन्दोलनको मुख्य कारण बनेको छ।
यसअघि पनि राष्ट्रिय एकता अभियानले मधेशदेखि काठमाडौंसम्म विभिन्न ठूला आयोजनामा भएको भ्रष्टाचारविरुद्ध प्रदर्शन गर्दै आएको छ। यो अभियानले जेन(जी आन्दोलनलाई “युवापुस्ताको नेतृत्वमा सुरु भएको ऐतिहासिक जागरण” का रूपमा व्याख्या गर्दै, आगामी दिनमा युवासँग मिलेर भ्रष्टाचारविरुद्धको लडाईँलाई अझ सशक्त बनाउने प्रतिवद्धता जनाएको छ।ा
